Lennon tryggði FH sigur í Finnlandi

FH-ingar eru í fínum málum í fyrstu umferð forkeppni Evrópudeildarinnar í fótbolta eftir 1-0 útisigur á SJK í dag í fyrri leik liðanna sem fór fram í Finnlandi.

Það var Skotinn Steven Lennon sem skoraði eina mark leiksins á 56. mínútu en það skoraði hann með skoti beint úr aukaspyrnu.

Þetta var fyrsta skot FH í leiknum á mark Finnanna en FH-liðið fóru varlega inn í leikinn og gáfu fá færi á sér. Finnarnir áttu þó sláarskot í fyrri hálfleiknum.

Mark FH-liðsins kveikti í lærisveinum Heimis Guðjónssonar sem voru betra liðið í seinni hálfleiknum og fögnuðu vel flottum sigri.

Þetta er gríðarlega mikilvægur sigur fyrir FH-liðið sem ætti að eiga mjög góða möguleika á því að komast áfram enda er seinni leikurinn á Kaplakrikavellinum í næstu viku.

Komist FH áfram mætir liðið annaðhvort Laci frá Albaníu eða Inter Baku frá Aserbaídsjan en þau gerðu 1-1 jafntefli í fyrri leik sínum sem fór fram í Albaníu í dag.