Skjálftinn færði Everest aftur um níu mánuði

Everest, hæsta fjall heims, færðist þrjá sentímetra í suðvesturátt í jarðskjálftanum sem skók Nepal í apríl síðastliðnum.

Skjálftinn, sem var af stærðargráðunni 7.8,  hafði þó engin áhrif á hæð fjallsins en Everest gnæfir 8848 metra yfir sjávarmál.

Kínversk stjórnvöld hafa allt frá árinu 2005 fylgst með hreyfingum fjallsins en það hefur að meðaltali færst fjóra sentímetra á ári til norðausturs og hraði þess aukist um 0.3 sentímetra á ári.

Skjálftinn í apríl færði því Everest aftur á þann stað sem það hafði verið 9 mánuðum áður.

Alls létust um 8000 manns í skjálftanum sem reið yfir Nepal þann 25. apríl síðastliðinn.

Tugir fjallgöngumanna á Everest féllu einnig í skjálftanum sem hleypti af stað fjölda snjóflóða á fjallinu. Öllum ferðum á fjallið var aflýst í kjölfarið.