Ferrari og Honda nota uppfærsluskammta

Mercedes og Renault hafa staðfest að vélasmiðirnir hafa ekki notað uppfærsluskammta sína. Ferrari og Honda hafa byrjað að nýta sér sína skammta.

Ferrari hafði þegar gefið í skyn að liðið ætlaði sér að uppfæra vél sína fyrir kanadíska kappaksturinn sem fram fer næstu helgi.

„Við munum ekki nota skammtana fyrir Kanada. Ekki spyrja mig hvenær við munum nota þá, ég vil halda því leyndu fyrir Þjóðverjunum (Mercedes),“ sagði Maurizio Arrivabene, liðsstjóri Ferrari.

Hins vegar hefur komið í ljós í skjali sem dreift var til liðanna í vikunni að Ferrari hefði notað þrjá skammta af tíu. Einnig kom fram að Honda hefði notað tvo af sínum níu.

Orð Arrivabene má túlka sem einhversskonar blekkingarleik. Líklegra er þó að hann sé að segja satt og að liðið hafi uppfært vél sína en muni ekki nota hana fyrr en eftir keppnina í Kanada.

Honda er talið stefna á stóra uppfærslu fyrir austurríska kappaksturinn sem er næstur á eftir þeim kanadíska. Báðar brautir henta vel aflmiklum bílum.

Skammtana mega liðin nota til að auka getu véla sinna en áreiðanleiki og öryggi falla þar utan og eru því ekki hluti af skammtakerfinu.

Hversu margir skammtar eru eftir:

Renault: 12

Ferrari: 7

Honda: 7

Mercedes: 7