Hlutabréf í New York Times ruku upp

Hlutabréf í New York Times Co. hækkuðu um 10,7 prósent síðdegis í dag eftir að Fox sjónvarpsstöðin tilkynnti að milljarðamæringurinn Michael Bloomberg hefði áhuga á að fjárfesta í blaðinu.

Bloomberg, sem er fyrrverandi borgarstjóri í New York, var reiðubúinn að greiða 5 milljarða dala fyrir blaðið. Markaðsvirðið er hins vegar einungis 2,3 milljarðar.

Talsmenn Bloombergs segja hins vegar fréttirnar ekki á rökum reistar. New York Post segir að Michael Bloomberg hafi áður gert tilboð í blaðið, en Sulzberger fjölskyldan, sem stjórnar blaðinu hefur hafnað tilboðum og sagt að það væri ekki til sölu.