Tólf bráðsnjöll húsráð sem munu auðvelda okkur lífið

Góð húsráð eru öllum ómissandi. Vísir hefur því tekið þau nokkur bráðsnjöll saman sem gott er að grípa til við hvimleiðum vandamálum. Þessi húsráð og fleiri má finna hér. 

Salt og sítróna á skurðarbrettið

Eflaust kannast flestir við hið leiðigjarna verkefni að þrífa skurðarbretti. Vökvi og ýmis óhreinindi eiga það til að safnast saman ofan í skurðum sem í þeim myndast og því oftar en ekki erfiðis vinna að hreinsa þau, sér í lagi skurðarbretti úr tré. Vinnan þarf þó ekki að vera svo erfið.

• Salt
• Sítróna

Það eina sem þarf er sítróna og gróft salt. Nudda skal sítrónunni og saltinu við brettið sem leysir upp öll óhreinindi. Að því loknu nægir að skola brettið með sápu og vatni.

Sturtuhausinn skolaður

Hvernig í ósköpunum á að þrífa sturtuhaus, spyrja margir. Verkefnið er einfalt. Einungis þarf að setja smá dreitil af ediki í plastpoka og plastpokinn festur með teygju á sturtuhausinn. Eftir eina til tvær klukkustundir er sturtuhausinn eins og nýr.

• Edik
• Plastpoki
• Teygja

Gólfteppi og dýnur

Það getur verið afar erfitt að þrífa gólfteppi og dýnur. Það þarf þó ekki að vera svo erfitt. Best er að byrja á að ryksuga burt helstu óhreinindin og í kjölfarið dreifa smá matarsóda á yfirborðið. Eftir að matarsódinn hefur fengið að liggja í nokkrar klukkustundir er ryksugan notuð að nýju og dýnan orðin hrein.

• Ryksuga
• Matarsódi

Kartöflur á rifjárnin

Líklega hafa einhverjir svamparnir og uppþvottaburstarnir endað í ruslinu eftir að hafa hamast á rifjárninu í einhvern tíma. Til þess að þrífa rifjárn á sem einfaldastan hátt er snjallt að nudda einni kartöflu við járnið. Lífræn sýra kartöflunnar [e.oxalic acid] leysir upp óhreinindin og nægir því að skola járnið að notkun lokinni.

• Kartafla
• Vatn

Engin þörf á að hamast á örbylgjuofninum

Hamagangur einkennir oft þrif á örbylgjuofnum. Í stað þess að eyða orku í þrifin er snjallræði að fylla eina skál af vatni og ediki, setja hana inn í ofninn og leyfa honum að vinna sína vinnu í um tvær mínútur. Að því loknu er nóg að þurrka aðeins yfir ofninn.

• Edik
• Vatn

 Leikföngin leiðigjörnu

Reglulega þarf að þrífa leikföng barnanna, eins og foreldrar kannast eflaust flestir við. Leikföngin eru mörg og margvísleg og því tímafrekt að þrífa hvert og eitt einasta. Þeir sem búa við þann munað að eiga uppþvottavél geta skellt leikföngunum þangað inn og fengið þau eins og ný til baka. Passa þarf þó upp á hitastigið.

• Uppþvottavél

Kaffivélin orðin þreytt? 

Sambland af vatni og ediki er til margs nýtilegt. Til að mynda þegar þrífa þarf kaffivélina. Blöndunni er hellt í vélina og hún sett af stað. Gott er að leyfa blöndunni að sitja í um það bil eina klukkustund áður en kveikt er á könnunni að nýju. Að lokum er hreint vatn sett í vélina og henni leyft að vinna, allt þar til ediklyktin er horfin.

• Vatn
• Edik

Hvernig á að þrífa rimlagardínur?

Erfitt getur reynst að þrífa rimlagardínur. Rimlarnir eru margir, ryksugan gerir lítið gagn og tuskan jafnvel líka, svo ekki sé talað um tímann sem fer í verkið. Rykið virðist alltaf gera sig heimakært á gardínunum og erfitt er að ná því af. Þess vegna komum við aftur að vatninu og edikinu. Þetta húsráð er kannski ekkert snjallræði, en eftir því sem Vísir kemst næst, eitt það besta. Gott er að klæða aðra höndina í gamlan sokk (helst hreinan) og dýfa honum ofan í ediksblönduna. Þannig er hægt að ná góðu taki á rimlunum en edikið er til þess fallið að koma hverri einustu rykörðu burt fyrir fullt og allt (í smá tíma í það minnsta). Svo er best að taka hinn sokkinn og þurrka bleytuna burt. Mýkingarefni er einnig hægt að nota í stað ediksins, það lyktar betur í það minnsta.

• Vatn
• Edik eða mýkingarefni
• Sokkur

Salt í eldfasta mótið

Eldföst mót eru ekkert til að hrópa húrra yfir. Fita og önnur óhreinindi koma sér afar haganlega fyrir í mótinu en eins og margir vita er erfitt að þrífa burtu fitu. Gott er að setja dass af grófu salti ofan í mótið og nudda það með volgu vatni og bursta eða svampi. Voilá, eldfasta mátið er hreint!

• Gróft salt
• Volgt vatn

Beygla á málverkið

Fátt er leiðinlegra en að sjá málverkin fögru sem prýða heimilisveggina svo vel verða óhrein. En hvernig á að koma í veg fyrir það? Það er einfalt. Ein beygla (brauðsneið dugar líka) og málið er dautt. Það eina sem þarf að gera er að nudda brauðbitanum við málverkið og það verður eins og nýtt.

• Beygla

 Tandurhreinn blandari á örskotsstundu

Það þarf ekki alltaf að taka blandarann í sundur til að þrífa hann. Stundum má vera latur. Því ætti að duga að setja í hann heitt vatn og dreitil af sápu og kveikja svo á honum. Áður en þú veist af er blandarinn tandurhreinn. 

• Heitt vatn
• Uppþvottalögur

Tannburstinn tekinn í gegn

Rannsóknir hafa sýnt að mikill fjöldi fólks þrífur ekki tannburstana sína. Ótrúlegt magn af óhreinindum sem við sjáum ekki safnast fyrir á burstanum og því er þörf á að skipta honum út á um það bil þriggja mánaða fresti. Þá er einnig þörf á að þrífa hann nokkrum sinnum á því tímabili. Það sem þarf er hreinn bolli og edit. Burstanum er dýft í edikið og leyft að liggja þar í nokkrar klukkustundir. Að því loknu er hann þrifinn með vatni og þá er tannburstinn orðinn örlítið hreinni. 

• Vatn
• Edik