Jón Ásgeir: „Enn á ný á að drösla mér niður í héraðsdóm“

„Ég hef mátt verja hendur mínar sem sakborningur síðustu 13 ár. Eitt tekur við af öðru. Tilgangurinn virðist vera sá að koma mér í fangelsi hvað sem það kostar.“ Þetta segir athafnamaðurinn Jón Ásgeir Jóhannesson í grein sem birtist í Fréttablaðinu í morgun þar sem hann fjallar um ákvörðun Hæstaréttar að vísa Aurum-málinu svokallaða aftur í hérað.

Jón Ásgeir er ákærður sem hlutdeildarmaður í viðskiptum sem áttu sér stað vorið 2008. Segir hann að um hafi verið að ræða fullkomlega eðlileg viðskipti sem embætti sérstaks saksóknara reyni að klæða í glæpabúning.

Ríkissaksóknari áfrýjaði málinu til Hæstaréttar og krafðist þess að héraðsdómur yrði ómerktur sökum ættartengsla Sverris Ólafssonar, sérfróðs meðdómanda í málinu, við Ólaf Ólafsson, sem var á dögunum sakfelldur í Hæstarétti fyrir hlutdeilt í umboðssvikum í Al Thani málinu.

Fór svo að dómurinn var ómerktur og vísað aftur í hérð þar sem Hæstiréttur taldi óhjákvæmilegt að líta svo á að ummæli Sverris Ólafssonar, meðdómara í Aurum-málinu, í kjölfar sýknudómsins í héraði gæfu tilefni til að draga með réttu í efa að hann hefði verið óhlutdrægur í garð ákæruvaldsins fyrir uppkvaðningu héraðsdómsins. Sverrir var annar tveggja dómara sem sýknuðu Jón Ásgeir og félaga í dómnum en einn vildi sakfella.

„Eigum við ekki að njóta vafans?“

Í grein sinni segir Jón Ásgeir að sú skýring að sérstakur saksóknari hafi ekki vitað af bræðratengslum Ólafs og Sverris Ólafssona fyrir meðferð málsins standist ekki.

„Hver trúir því að 100 manna herlið sérstaks saksóknara kunni ekki á Google þar sem tengslin liggja fyrir? Hvaða hugsanlega ástæðu hafði héraðsdómarinn til þess að ljúga til um samskipti sín við sérstakan saksóknara?

Skiptir ekki máli að bréf liggur frammi í málinu frá meðdómaranum sem styður frásögn héraðsdómarans? Af hverju er svona rugl í kerfinu tekið út á okkur sem vorum sýknaðir? Ekki er við okkur að sakast um það sem gerðist. Eigum við ekki að njóta vafans? Það er skelfilegt að upplifa þá tilfinningu að Hæstiréttur haldi hlífiskildi yfir óheiðarlegum embættismanni en láti réttindi fjögurra einstaklinga lönd og leið.“

Rótað í nærbuxnaskúffu

Jón Ásgeir segir í greininni að gerðar hafi verið ótal húsleitir heima hjá sér og í fyrirtækjum sem honum tengjast.

„Rótað hefur verið í nærbuxnaskúffu minni, síminn minn hleraður og mikilvægum gögnum haldið undan í dómsmálum. Og ekki hefur eiginkona mín verið látin í friði. Hennar símar hafa verið hleraðir og húsleitir gerðar í hennar fyrirtækjum án þess að hún hafi nokkurn tíma á ævinni fengið stöðu sakbornings. Sök hennar virðist sú ein að hafa gifst röngum manni.“

Hann segir niðurstöðu miðvikudagsins þó vera staðreynd.

„Enn á ný á að drösla mér niður í héraðsdóm, þar sem ákæruvaldið í landinu fær frjálsar hendur til að færa fram sakargiftir sínar á hendur mér. Ákæruvaldið hefur eytt milljörðum króna af fé íslenskra skattborgara síðustu 13 ár til þess eins að finna einhvern glæp, svo hægt sé að taka mig úr umferð. Ég er viss um að eftir 20 ár munum við fyrirlíta svona vinnubrögð. En af hverju gerist þetta aftur og aftur? Fyrir mér er svarið einfalt – kerfið sér jú um sína – og ver sig með kjafti og klóm. Verst þykir mér samt að sjá að Hæstiréttur skuli spila með.“