Tók kynmök við 16 ára stúlku upp á vefmyndavél

Héraðsdómur Reykjaness hefur dæmt 22 ára gamlan karlmann í þriggja mánaða skilorðsbundið fangelsi fyrir að taka upp kynmök sem hann átti við 16 ára gamla stúlku árið 2013. Hann var þá tvítugur að aldri.

Í ákæru segir að maðurinn hafi „sýnt af sér lostugt athæfi er hann tók upp með vefmyndavél kynmök sín við A, sem þá var 15 ára gömul, án vitundar hennar, og hafði myndskeiðið í vörslum sínum um nokkurt skeið í tölvu sinni þar sem þáverandi unnusta ákærða sá myndskeiðið. Með framangreindri háttsemi særði ákærði blygðunarsemi A.“

Tekið er fram í dómnum að rangt sé farið með aldur stúlkunnar í ákæru, en hún var nýorðin 16 ára gömul þegar brotið átti sér stað.

Maðurinn játaði brot sitt skýlaust fyrir dómi og var það virt honum til málsbóta. Hann hafnaði hins vegar bótakröfu upp á 1.500.000 milljónir króna sem allt of hárri. Fram kemur í dómnum að ákærði „hafi ekki sýnt neinum umrætt myndefni og hafi eytt því.“ Þá hafi stúlkan ekki sést nakin í myndskeiðinu auk þess sem það var óskýrt þar sem ljósin voru slökkt.

„Þá verði við mat á bótum að horfa til þess að ekki hafi verið lögð fram nein gögn um andlegan líðan brotaþola, segir einnig í dómnum en þrátt fyrir það sé ljóst að athæfi mannsins hafi „haft í för með sér andlega þjáningu.

Stúlkan hafi því átt rétt á miskabótum og var maðurinn dæmdur til að greiða henni 300.000 krónur.

Uppfært klukkan 23: Í upphaflegri útgáfu þessarar fréttar láðist að geta þess rangt var farið með aldur stúlkunnar í ákæru. Það hefur nú verið leiðrétt.