Inter komst yfir en tapaði 3-1 | Sjáið mörkin hjá De Bruyne

Fjórum fyrstu leikjum dagsins í sextán liða úrslitum Evrópudeildarinnar í fótbolta er nú lokið. Hollenska liðið Ajax og ítalska liðið Internazionale töpuðu bæði sínum leikjum á útivelli en þetta eru fyrri leikirnir.

Stjörnubanarnir í Internazionale komust í 1-0 eftir aðeins sex mínútna leik á móti Wolfsburg í Þýskalandi en þurftu að sætta sig við 3-1 tap. Staðan er því slæm fyrir Ítalana en hún hefði getað verið verri.

Gamli Chelsea-maðurinn Kevin De Bruyne skoraði tvö og lagði upp eitt fyrir Wolfsburg en seinna markið skoraði hann beint úr aukaspyrnu. De Bruyne fékk síðan dauðafæri til að innsigla þrennuna í uppbótartíma en skaut framhjá.

Internazionale var ekki eina ítalska liðið sem tapaði á útivelli því Torino tapaði 2-0 á móti í Rússlandi eftir að hafa misst Marco Benassi af velli með rautt spjald á 28. mínútu. Mörk Rússanna komu á 38. og 53. mínútu leiksins.

Ajax tapaði 1-0 á móti Dnipro Dnipropetrovsk í Úkraínu. Roman Zozulya skoraði sigurmarkið eftir hálftíma leik. Kolbeinn Sigþórsson fór ekki með Ajax til Úkrainu en hann er meiddur.

Gömlu liðsfélagar Eiðs Smára Guðjohsen í Club Brugge lentu 1-0 undir á heimavelli á móti tyrkneska liðinu Besiktas en tryggðu sér sigur með tveimur mörkum á síðasta hálftíma leiksins.



Úrslit úr leikjum sextán liða úrslita Evrópudeildarinnar:

Zenit St. Petersburg - Torino    2-0

1-0 Axel Witsel (38.), 2-0 Domenico Criscito (53.)

Club Brugge - Besiktas    2-1

0-1 Gökhan Töre (46.), 1-1 Tom De Sutter (62.), 2-1 Lior Refaelov (79.)

Dnipro Dnipropetrovsk - Ajax    1-0

1-0 Roman Zozulya (30.)

Wolfsburg - Internazionale    3-1

0-1 Rodrigo Palacio (6.), 1-1 Naldo (28.), 2-1 Kevin De Bruyne (63.), 3-1 Kevin De Bruyne (76.)

Mörkin hans Kevin de Bruyne í leiknum.