Getur ekki bólusett barnið sitt og leggur traust sitt á aðra foreldra

Haukur Arnar Óskarsson er tveggja ára kátur drengur. Þegar hann var þriggja mánaða kom í ljós að hann væri með ofnæmi eða óþol fyrir einstaka bóluefnum og því hefur gengið illa að bólusetja hann. María Hauksdóttir, móðir Hauks Arnars, segir að foreldrar barna sem ekki er hægt að bólusetja, verði að geta treyst á að önnur börn séu það.

Haukur Arnar fékk, eins og flest börn, fyrstu bólusetninguna þriggja mánaða. María var meðvituð um að hann gæti orðið slappur fyrsta sólarhringinn, en hún á tvö önnur börn, sem bæði eru bólusett. Haukur var hins vegar óvenju bólginn eftir sprautuna.

„Hann fékk um 38 stiga hita, sem var svosem alveg við að búast. Ekki svo löngu seinna rauk hann upp í hita, mjög hratt og snögglega, alveg í um 40 stig. Eins fannst okkur bólgan á lærinu meiri en við áttum að venjast og höfðum því samband við lækni. Við sögðum frá því að hann hefði verið að koma úr bólusetningu og okkur var sagt að fara með barnið strax upp á barnaspítala,“ segir María.

Mótefnið til staðar

Á spítalanum var tekin ákvörðun um að einungis barnalæknir mætti bólusetja Hauk. Líkur voru taldar á að hann væri með óþol fyrir bóluefninu gegn kíghósta. Barnalæknir á Heilbrigðisstofnun Suðurnesja mælti svo gegn því að barnið yrði bólusett fimm og tólf mánaða en sendi Hauk Arnar þess í stað í blóðrannsóknir.

„Læknarnir vildu meina að þetta væru efnin gegn kíghósta sem hann fékk óþol fyrir. Hann fór því í blóðprufur til að athuga hvort mótefnin væru fyrir hendi, sem þau voru. Það eru ekki allir sem svara fyrstu bólusetningunni en hann gerði það og er þar með varinn. Við vorum bara heppin. Ef hann hefði ekki fengið mótefnin þá hefði bara þurft að setja hann inn í kúlu,“ segir hún.

Lifa í núinu 

Bólusetningin sem um ræðir er í einni sprautu og er við barnaveiki, stífkrampa og kíghósta. Hún er framkvæmd við þriggja, fimm og tólf mánaða aldur og sú síðasta við fjögurra ára aldur. María segir erfitt að hugsa til þess að barnið gæti verið móttækilegt fyrir þessum sjúkdómum og vildi því vekja umræðu um málið.

„Við viljum ekki að barnið okkar fái einhverja sjúkdóma eða smiti önnur börn. Það var alveg tímabil þar sem við vorum virkilega hrædd. Hvað ef hann er ekki varinn?“

Haukur Arnar hefur brugðist vel við öðrum bólusetningum en þessari tilteknu sprautu, að sögn Maríu.

„En það má væntalega ekki bólusetja hann með þessu aftur, hvað þá? Við höfum tekið ákvörðun um að lifa bara í núinu og vera ekkert stressuð. Við gúglum ekki og spyrjum ekki mikið. Við viljum ekki vita það akkúrat núna. Núna er hann bara tveggja ára,“ segir María og biður fólk um að treysta ráðleggingum lækna.

„Maður ver börnin sín. Maður setur á barnið hjálm þegar það fer út að hjóla. Þegar maður setur það í stólinn þá festir maður það gaumgæfilega. Þessir sjúkdómar eru alvöru og við verðum að verja börnin okkar og treysta því sem hámenntað heilbrigðisstarfsfólk mælir með,“ segir hún að lokum.