Dennis: Hönnunarstefnan skapar vandamálin

Vandamálin sem hrjá McLaren bílinn má rekja til hönnunarstefnu Peter Prodromou samkvæmt liðsstjóra McLaren, Ron Dennis.

Dennis hefur lýst MP4-30 sem fyrsta bílnum í „stærð núll“ vegna þess hversu þétt hann er pakkaður utan um Hondu vélina sem knýr hann áfram. Hann minnir einna helst á flöskuháls.

Dennis hefur einnig lýst bílnum sem „meistaraverki“ og gerir gríðarlegar kröfur til hans. Hann bíður þess að Honda finni lausn á vandanum sem plagaði bílinn í fyrstu æfingalotunni í Jerez.

„Hvað varðar þróunina á MP4-30 tókum vð vissa áhættu. En við vitum nákvæmlega hvað við erum búin að koma okkur út í og hverju það getur skilað okkur í framtíðinni. Uppröðun bílsins er mjög þétt og við verðum að byrja á að glíma við afleiðingar þess,“ sagði Dennis.

Dennis er sammála Fernando Alonso, öðrum ökumanni liðsins sem sagðist ekki vilja setja sér markmið strax. Hann vissi hreinlega ekki hvar bíllinn stæði.

„Ég held að við munum ekki skilja bílinn sem við erum með fyrr en eftir þriðju keppnina á tímabilinu, en við erum bjartsýn og höfum fulla trú á að við munum ná árangri,“ bætti Dennis við.

„Við gerum miklar kröfur til þessa bíls og við verðum að þakka Peter Prodromou fyrir að skapa þetta meistaraverk,“ sagði Dennis að lokum.