Maldonado fljótastur á viðburðaríkri æfingu

Pastor Maldonado á Lotus setti besta tímann á fyrsta degi annarrar æfingalotu fyrir komandi tímabil í Formúlu 1. Dagurinn var gríðarlega viðburðaríkur.

Kimi Raikkonen á Ferrari var lengst framan af fljótastur en tími Maldonado var 0,156 sekúndum betri en Raikkonen. Þessi æfingalota fer fram á Katalóníubrautinni og voru tímar Maldonado og Raikkonen betri en tíminn sem Lewis Hamilton tryggði sér ráspól með á brautinni í fyrra.

Hamilton hætti akstri snemma í morgun vegna veikinda. Hann var búinn að aka 11 hringi og átti lakasta tíma dagsins, rúmum fimm sekúndum hægari en Maldonado.

Mercedes brá á það ráð að kalla til þróunarökumann sinn, Pascal Wehrlein, sem var að sinna æfingum fyrir Force India, hann ók því báðum bílum í dag. Hinn tvítugi Wehrlein ók 62 hringi í Force India bílnum og 18 í Mercedes bílnum. Hann fór næstum tveimur tíundu úr sekúndu hraðar á Force India bílnum.

Veikindi Hamilton þýddu það að Sergio Perez kláraði daginn fyrir Force India. hann var rúmlega einni og hálfri sekúndu hægari en Maldonado en náði fjórða besta tímanum og ók 34 hringi. Perez átti ekki að aka fyrr en á morgun.

Óljóst er hvort Nico Rosberg getur ekið á morgun, hann finnur fyrir eymslum í hálsi. Kannski fær Wehrlein aftur tækifæri í Mercedes bílnum á morgun.

Susie Wolff, þróunarökumaður Williams lenti í samstuði við Felipe Nasr á Sauber og skemmdust báðir bílar talsvert. Bæði náðu þau þó að keyra meira undir lok dags, þökk sé öflugu þjónustuliði beggja liða.