Svona líta nýju formúlu eitt bílarnir út | Myndir

Mercedes W06 ók lang lengst allra í dag eða 157 hringi sem verðurað teljast gríðarlega gott á fyrsta degi æfinga. Nýr fjöðrunarbúnaður, ný vél og nýtt kælikerfi virka greinilega vel. Mercedes kann klárlega að smíða kappakstursbíla.

Red Bull afhjúpaði sinn bíl í morgun, hann er í felulitum af ásettu ráði. Bíllinn á ekki að sjást eins vel, eitthvað vill liðið fela af honum eða draga athygli frá nýjum uppfinningum. Hann verður þó ekki í felulitum eftir að æfingum lýkur.

Williams bíllinn er mjög svipaður bíl síðasta árs. Helsti munurinn er í fljótu bragði trjónan, henni svipar nú meira til þumals en banana.

Toro Rosso dró dúkinn af sínum nýja keppnisbíl í dag. Lítið sem ekkert hafði lekið af upplýsingum um bílinn og því var spennan mikil Framendi bílsins er ólíkur framenda systurbílsins, Red Bull, það kemur á óvart. Framtrjónunni svipar mjög til nýrrar trjónu Ferrari bílsins.

Sauber er sá bíll sem útlitslega hefur breyst hvað mest. Litirnir eru endurnýjun frá því í byrjun aldarinnar. Blár og gulur og gríðar svalur á brautinni í Jerez. Trjónan á nýja Sauber bílnum er einskonar millstig á milli Ferrari og Williams.

Æfingarnar halda svo áfram á morgun, þá munu Lotus væntanlega mæta til leiks.