Arrivabene: Keppinautar okkar í feluleik

Liðsstjóri Ferrari, Maurizio Arrivabene er ánægður með frammistöðu liðsins í fyrstu æfingalotunni. Hann segir þó að margir keppinauta liðsins geti meira en þeir hafi sýnt.

Sebastian Vettel var fljótastur fyrstu tvo dagana og Kimi Raikkonen var fljótastur fjórða daginn. Einhverjar raddir hafa heyrst um að Ferrari hafi stigið ógnvænlega stórt framfara skref í vetur.

Góð tákn eru á lofti samkvæmt Arrivabene sem segist þó vera með báða fætur á jörðinni og er viss um að keppinautar liðsins geti meira en þeir sýna.

„Samanborið við síðasta ár, þá hafa þessir dagar á æfingum sýnt að við getum verið bjartsýn,“ sagði Arrivabene.

„Umfram allt, þá er ég ánægður með að liðið hefur fundið innblásturinn og liðsandann aftur,“ bætti hann við.

Arrivabene segir að einn keppinautur eigi umfram aðra eftir að sýna hvað hann getur í raun og á þá væntanlega við Mercedes liðið. Hann segir að nákvæmari mynd komist á hlutina í komandi æfingalotum á Katalóníubrautinni á Spáni.