Brotið sem réði örlögum íslenska landsliðsins á HM í Katar | Myndband

Tékkinn Ondrej Zdráhala átti líklega meiri þátt í örlögum íslenska handboltalandsliðsins á HM í Katar en margur annar leikmaður móherja Íslands á heimsmeistaramótinu.

Það var nefnilega hinn 31 árs gamli Ondrej Zdráhala sem braut það illa á Aroni Pálmarssyni í Tékkaleiknum að besti leikmaður íslenska liðsins spilaði ekki meira með á HM.

Ondrej Zdráhala fór út í Aron með öxlina á undan sér og Aron lá á eftir með vægan heilahristing.

Aron var fyrir leikinn á móti Tékkum sá leikmaður sem var búinn að eiga þátt í flestum mörkum á heimsmeistaramótinu og Tékkarnir lögðu ofurkapp á að stoppa hann.

Eftir brotið sést þegar Ondrej Zdráhala "fær fimmu" frá liðsfélaga sínum Jakub Szymanski og fólk getur vissulega túlkað það á ýmsa vegu.

Myndbandið af brotinu sem réð örlögum íslenska landsliðsins á HM í Katar má sjá hér fyrir neðan.