The Charlies hætt

Stúlknabandið The Charlies er hætt en frá þessu er greint í Sunnudagsblaði Morgunblaðsins.

Þær Alma Guðmundsdóttir, Steinunn Þóra Camilla Sigurðardóttir og Klara Ósk Elíasdóttir ætla samt sem áður að búa áfram Í Los Angeles og reyna fyrir sér í skemmtanabransanum.

Þær stöllur hafa búið í borginni í fimm ár og myndað bandið The Charlies. Áður hét bandið Nylon en auk hinna fyrrnefndu þriggja var Emilía Óskarsdóttir einnig í hljómsveitinni.

„Það er töluvert síðan við áttuðum okkur á því að hæfileikar okkar liggja á ólíkum sviðum, þó að þeir skarist líka. Allt þetta margra ára ferli hefur skerpt á því,“ segir Steinunn Camilla í samtali við Morgunblaðið.

Sjá einnig:The Charlies í heilsuþætti rokkstjarna

Þær Alma og Klara ætla að halda áfram á tónlistarsviðinu en Steinunn ætlar hefur áhuga á að koma íslenskri tónlist á framfæri ytra. Ætlar hún að stofna fyrirtæki í þeim tilgangi ásamt Soffíu Kristínu Jónsdóttur.

„Fyrirtækið mun heita Iceland Sync og mun meðal annars sérhæfa sig í að koma íslensku efni til Bandaríkjanna. Við erum þegar byrjaðar að vinna með nokkrum listamönnum, en það þarf varla að taka það fram að ég mun að sjálfsögðu vilja vinna með Ölmu og Klöru í að koma þeirra efni á framfæri,“ segir Steinunn.

Uppruna hljómsveitarinnar má rekja til ársins 2004 þegar Alma, Klara og Steinunn voru hlutskarpastar í áheyrnarprufum sem umboðsmaðurinn Einar Bárðarson stóð fyrir. Skömmu síðar var Emilíu boðið að vera með í sveitinni og eftir að hafa hitt stúlkurnar ákvað hún að slá til.

Hljómsveitin naut nokkurra vinsælda hér heima með endurútgáfu á laginu „Lög unga fólksins“ auk laganna „Fimm á Richter“ og „Bara í nótt“.

Árið 2006 náði hljómsveitin vinsældum erlendir þegar lagið „Losing a Friend“ var gefið út í Englandi. Lagið náði í 29. sæti vinsældalista í Bretlandi og fór Nylon meðal annars á tónleikaferðalag með hljómsveitunum Westlife og Girls Aloud.

Sumarið 2007 ákvað Emilía að segja skilið við sveitina en stelpurnar þrjár létu ekki deigan síga. Þær gáfu út plötu með bestu lögum sveitarinnar árið 2007 og héldu áfram að spila utan landsteinanna. Árið 2008 sneru stelpurnar svo heim.

Árið 2010 var The Charlies svo formlega stofnuð og héldu stúlkurnar til Los Angeles þar sem þær hafa verið síðan eða í tæp fimm ár. Stofnuðu þær Facebook-síðu af því tilefni.

Post by The Charlies.

Nú hafa þær hins vegar farið sínar eigin leiðir en eru þó áfram miklar vinkonur. Gildir það einnig um Emilíu sem hefur alltaf verið í góðu sambandi við hinar þrjár.