Óljóst hvort Ólafur taki aftur við

Ómar Ómarsson, formaður handknattleiksdeildar Vals, segir að enn sé óvíst hvort Ólafur Stefánsson taki aftur við sem þjálfari Vals í Olísdeild karla eftir áramót. Það stóð til þegar tilkynnt var um skyndilegt brotthvarf hans úr starfinu í byrjun september.

„Við erum að einbeita okkur að því að klára þá leiki sem eftir eru og svo tökum við á því þegar það klárast,“ sagði Ómar. „En það er alveg inni í myndinni.“

Hann segir að Ólafur hafi ekki skipt sér af æfingum eða þjálfun liðsins eftir að hann hætti í haust. „Hann hefur gefið þeim Jóni [Ríkharði Kristjánssyni] og Óskari [Bjarna Óskarssyni] algjöran frið til að sinna sinni vinnu,“ segir Ómar.

Valsmenn gáfu Ólafi frí til að sinna verkefni sem nýstofnað fyrirtæki hans var að setja af stað. „Við höfum fullan skilning á því og við höfum í raun ekkert unnið meira í þessu máli. Það er nægur tími í þessu fríi til að skoða þessi mál en við erum þar að auki ekki illa settir um þessar mundir.“

Valur hefur átt góðu gengi að fagna að undanförnu og staða liðsins í deildinni sterk. Aðeins tvær umferðir eru eftir þar til vetrarfrí hefst fram yfir HM í handbolta en hlé verður gert á deildinni þann 18. desember.