Benjamín dúfa flýgur út fyrir landsteinana

„Í stórum dráttum þá hringdi ég í Friðrik Erlingsson, rithöfund og dundaði mér í smá tíma við að færa þetta yfir á ensku,“ segir kvikmyndagerðarmaðurinn Erlingur Jack Guðmundsson, sem hefur orðið sér úti um réttinn á Benjamín dúfu í Bandaríkjunum. Hann framleiddi einmitt hrollvekjuna Grafir og bein.

„Mig langaði að gera mynd úti á einhverjum tímapunkti og fannst það kjörið verkefni þar sem flestir leikararnir eru krakkar og þú þarft ekki einhverja stóra stjörnu.“ Að sögn Erlings tók Friðrik vel í hugmyndina þannig að Erlingur sendi bókina út til framleiðandans Susan Kirr, sem kom meðal annars að myndunum A Scanner Darkly og The Tree of Life.

„Hún las bókina yfir eina helgi og var strax til í þetta. Hún fékk Brandon Dickerson til að vinna í handritinu, sem hann mun skila af sér á allra næstu dögum. Hann hefur skrifað mikið fyrir Disney og gerði líka myndina Sironia.“

Erlingur segist vonast til að geta farið í tökur á næsta ári og að það væri ekki verra að fá íslenskan leikstjóra í þokkabót. „Það er allavega komið 30 prósetn fjármagn frá Texas og ég leita nú að fjárfestum á Íslandi sem eru til í eitthvað ævintýri,“ segir Erlingur og bætir við að handritið líti afar vel út.

„Þetta er Ameríkuvætt aðeins en ekkert alltof mikið, þetta er enn þá sama sagan, sem er jákvætt. Nema hvað hún gerist í Texas og á ensku,“ segir Erlingur hlæjandi.