Tjá sig ekki um Kára

Eins og Fréttablaðið greindi frá í gær er landsliðsmaðurinn Kári Kristján Kristjánsson hundfúll með hegðun uppeldisfélags síns, ÍBV.

Hann taldi sig hafa komist að samkomulagi um samning við ÍBV er félagið dró í land um síðustu helgi. Kári var mjög hissa á þessum vinnubrögðum handknattleiksdeildarinnar og vandaði henni ekki kveðjurnar í viðtali í gær.

Þar sagðist hann hafa verið svikinn af uppeldisfélagi sínu og það væri mjög sárt.

Forsvarsmenn handknattleiksdeildar ÍBV vildu ekki tjá sig um málið í gær er íþróttadeild leitaði eftir viðbrögðum.

Þeir funduðu þó um málið í gærkvöld og höfðu engin tíðindi borist af fundinum er Fréttablaðið fór í prentun.