Aníta: Þetta var góð byrjun á árinu 2014

Aníta Hinriksdóttir vann örugglega 800 metra hlaup kvenna í frjálsíþróttakeppni Reykjavíkurleikanna í gær.

Aníta var vel studd af áhorfendum í Laugardalshöllinni og hún vann ekki aðeins öruggan sigur því hún setti í leiðinni nýtt Íslandsmet fullorðinna og nýtt Evrópumet unglinga. Aníta náði forskotinu strax á upphafsmetrunum og leit aldrei um öxl eftir það.

„Ég er mjög ánægð með þetta, ég náði að hlaupa á jöfnum hraða allan tímann og náði tímanum sem ég ætlaði mér,“ sagði Aníta eftir hlaupið.

„Ég hef þá tilhneigingu að byrja hratt en ég náði að hlaupa jafnt í dag og fyrir vikið átti ég meira inni undir lokin. Markmiðið var að bæta Íslandsmetið í dag og ég náði því markmiði. Ég tók rólegar æfingar í vikunni til að vera fersk í dag eftir mikið álag undanfarið. Þetta er góð byrjun á árinu, að fá jafn sterka samkeppni og þetta og að vinna síðan á heimavelli var auðvitað æðislegt,“ sagði Aníta.

„Þetta fór fram úr mínum björtustu vonum, við vissum fyrir mótið að hún væri tilbúin í þetta en þetta var stórkostlegt. Ég vissi að ef hún væri á 1:30 eftir 600 metra myndi hún ná að slá metið hérna í dag. Ég gæti ekki verið stoltari,“ sagði Gunnar Páll Jóakimsson, þjálfari Anítu.

„Við stilltum þessu upp á æfingum í vikunni þannig að hún væri tilbúin í dag. Það er langt keppnistímabil framundan og framundan er bæði HM innanhúss og Norðurlandamót á næstunni og því taka núna við stífar æfingar til að undirbúa það,“ sagði Gunnar.