Lýsti hlutverki sínu í nýju Star Wars myndinni árið 1983

Leikarinn Mark Hamill, sem flestir þekkja sem Loga Geimgengil, lýsti mögulegu hlutverki sínu í Star Wars: The Force Awakens, í sjónvarpsviðtali árið 1983. En um 32 árum seinna mun myndin koma til sýninga í kvikmyndasölum um heim allan.

Tökum á þriðju Star Wars myndinni var nýlokið á þessum tíma og segir Hamill frá því að George Lucas hafi spurt hann: „Værir þú til í að leika Obi-Wan týpu sem gefur Excalibur áfram til næstu kynslóðarinnar?" Þegar Hamill spurði Lucas hvenær það yrði var svarið: „Um 2011.“

Ljóst er að myndin hefur dregist um nokkur ár, en í síðustu viku var stikla fyrir nýjustu Star Wars myndina birt á netinu. Í henni leika Mark Hamill, Harrison Ford og fleiri leikarar sem léku í gömlu myndunum auk nýrra leikara. Nýja myndin er sú fyrsta í nýjum þríleik.