„Við erum svo sannarlega ekki sigurstranglegastir í riðlinum þrátt fyrir stöðuna,“ sagði Pavel Vrba, þjálfari tékkneska landsliðsins í fótbolta, við tékkneska fjölmiðla eftir 2-1 sigurinn á Íslandi í gær.
Tékkland er á toppi riðilsins með tólf stig eða fullt hús eftir fjóra leiki og er ansi líklegt til að bóka sér farseðil til Frakklands á EM sumarið 2016.
„Ég skal viðurkenna það að við erum komnir með góðan grunn til að byggja á, en ég held að við þurfum allavega tíu stig til viðbótar. Við eigum fullt af erfiðum leikjum eftir eins og gegn Hollandi sem er komið aftur á skrið,“ sagði Vrba.
Ísland komst yfir í leiknum í gær með marki Ragnars Sigurðssonar sem Ísland skoraði eftir langt innkast Arons Einars Gunnarssonar. Kolbeinn Sigþórsson hafði þá betur gegn markverðinum Petr Cech í baráttunni sem varð til þess að Birkir Bjarnason lagði boltann með höfðinu fyrir Ragnar.
„Við vissum að þarna væru Íslendingarnir sterkir. Þeir voru hættulegastir þegar þeir köstuðu inn á teiginn af 25 metra færi frekar en í öðrum föstum leikatriðum. Við vörðumst þessu ekki vel til að byrja með og ég biðst afsökunar á því. Svona gerist í boltanum,“ sagði Vrba.
„En við stóðum okkur mun betur í seinni hálfleik og vörðumst tveimur hættulegum innköstum mjög vel. Ég er stoltur af strákunum og þeim karakter sem liðið sýndi. Þetta var eins og í Tyrklandi á dögunum; alveg frábært.“
Þýskaland
Pólland
