Marcus Ericsson til Sauber

Sænski ökuþórinn Marcus Ericsson hefur samið við Sauber liðið í Formúlu 1. Hann ók áður fyrir Caterham liðið sem nýlega lýsti yfir gjaldþroti.

Hinn 24 ára Ericsson hóf ferill sinn í Formúlu 1 á þessu tímabili. Hann hefur lýst samningnum sem bestu jólagjöf sem hann hefur fengið.

„Eftir afar erfiða viku, fékk ég skyndilega bestu snemmbúnu jólagjöf sem ég hef fengið. Sauber liðið hefur ákveðið að treysta á mig á næsta ári sem fyllir mig stolti þar sem Sauber er frægt fyrir að vera eitt besta liðið fyrir unga ökumenn til að sækja sér reynslu. Þetta verður mikil áskorun,“ sagði Ericsson á heimasíðu liðsins.

Samningurinn eykur á óvissu núverandi ökumanna liðsins, Esteban Gutierrez og Adrian Sutil hafa báðir verið taldir á förum frá liðinu.

Liðsstjóri Sauber, Monisha Katleborn telur að enn eigi eftir að koma mikið frá Ericsson. „Við erum sannfærð um að Marcus fylgi aukin meðbyr,“ segir Katleborn.

Samkvæmt óstaðfestum heimildum verður liðsfélagi Ericsson hjá Sauber á næsta ári Giedo van der Garde, núverandi þróunarökumaður liðsins.

Fjárstyrkur frá styrktaraðilum Ericsson virðast ráða miklu um saminginn. Slíkir hagsmunir virðast því miður oft hafa lokaorðið í Formúlu 1 þessi misserin á kostnað hæfileikaríkra ökumanna. Að Marcus Ericsson algjörlega ólöstuðum.