Sebastian Vettel til Ferrari

Fjórfaldi heimsmeistarinn Sebastian Vettel hefur tekið ákvörðun um að yfirgefa herbúðir Red Bull þar sem hann hefur unnið alla sína titla í Formúlu 1.

Vettel sagðist einfaldlega vilja breyta til. Hann sagðist vera að fara frá stað sem væri erfitt að yfirgefa. Einnig ítrekaði Vettel að ákvörðunin hefði ekkert með gengi liðsins á tímabilinu að gera. Líklega væri þó tóninn annar ef hann væri á leiðinni að sínum fimmta titli með liðinu.

Ýtir þessi tilkynning undir orðróm um að Fernando Alonso sé á förum frá Ferrari yfir til McLaren, þó hefur ekkert fengist endanlega staðfest um það.

Vettel greindi liðsstjóra Red Bull, Christian Horner frá ákvörðun sinni í gærkvöldi.

„Hann sagði okkur frá þessu í gærkvöldi og hafði sínar ástæður fyrir því. Ég held að hann hafi ekki átt auðvelt með þessa ávörðun. En ef hann vill vera annars staðar þá ætlum við ekki að stöðva hann,“ sagði Horner.

„Frá og með 1. janúar verður hann keppinautur okkar. Hann verður Ferrari ökumaður,“ bætti Horner við.

Vettel hefur verið viðloðinn liðið í 15 ár. Líklega hefur Ferrari verið of freistandi kostur. Daniil Kvyat hefur verið staðfestur arftaki Vettel hjá Red Bull.

Marco Mattiacci, liðsstjór Ferrari vildi lítið gefa upp um málið.

„Ég hef verið upptekinn við annað, ef þeir (Horner og Helmut Marko) vilja tilkynna svona hluti fyrir okkur þá gera þeir það bara,“ sagði Mattiacci.

Hvernig rautt fer Vettel á eftir að koma í ljós, fær hann það sem hann vill hjá ítalska risanum? Er Vettel að leggja upp í endurreisnarverkefni með Ferrari, ævintýri sem gæti skilað öðru eins og því sem hann átti svo stóra þátt í hjá Red Bull? Það gæti verið það sem hann hugsar sér að gera.