McGregor afgreiddi Poirier í fyrstu lotu

Írinn og Íslandsvinurinn Conor McGregor stóð við stóru orðin, enn og aftur, er hann mætti Dustin Poirier í Las Vegas.

Margir héldu að Poirier myndi lækka rostann í Íranum kjaftfora en sú varð heldur betur ekki raunin.

Líkt og venjulega hafði McGregor lofað því að rota andstæðing sinn í fyrstu lotu og það er nákvæmlega það sem hann gerði.

Í raun tók það McGregor ekki nema tæpar tvær mínútur að afgreiða Poirier.

„Ég rota ekki bara andstæðinga mína. Ég vel í hvaða lotu ég geri það," sagði McGregor eftir bardagann en þetta var tólfti sigur hans í röð og sá fjórði í UFC.

„Það sem þessir strákar fatta ekki er að þetta er allt annar leikur þegar þeir fá högg frá mér."

McGregor óskaði síðan eftir því að fá að keppa um heimsmeistaratitilinn í fjaðurvigtinni. Hver veit nema honum verði að ósk sinni.