Anna Úrsúla aftur á heimaslóðir

Anna Úrsúla Guðmundsdóttir hefur gert tveggja ára samning við Gróttu og snýr því aftur til síns gamla félags.

Anna hefur síðastliðin fimm ár spilað með Val þar sem hún hefur verið í lykilhlutverki. Hún varð Íslandsmeistari með liðinu í vor og valin besti varnarmaður deildarinnar.

Fram kemur í fréttatilkynningu frá Gróttu að henni er ætlað að fylla í skarð Lene Burmo sem er farin aftur til Noregs þar sem hún mun leika með Skrim á næsta tímabili.

Grótta endaði í fimmta sæti Olísdeildar kvenna á síðasta tímabili og spilaði til úrslita í deildarbikarkeppninni.