Sigurbergur til HC Erlangen

Sigurbergur Sveinsson er á leið í atvinnumennsku á næsta tímabili, en stórskyttan mun spila með HC Erlangen í þýsku úrvalsdeildinni.

HC Erlangen verða nýliðar í úrvalsdeildinni, en þeir tryggðu sér sæti í henni með að lenda í öðru sæti í næst efstu deild þar í landi. Þeir voru með jafn mörg stig og liðið í efsta sæti og þremur stigum á undan liðinu í þriðja sæti.

„Ég er búinn að vera vinna í mínum málum að undanförnu og er mjög sáttur með þessa lendingu. Ég er mjög spenntur fyrir komandi tímum í Þýskalandi,“ sagði Sigurbergur í samtali við Gaflari.is.

Sigurbergur lék afar vel í liði Hauka í vetur. Haukar urðu deildarmeistarar, en töpuðu svo úrslitaeinvíginu gegn ÍBV, 3-2.