20 punda lax úr Norðurá

Norðurá er ekki þekkt fyrir að vera nein stórlaxaá en í morgun kom einn slíkur á land og mældist sá fiskur 20 pund.

Það var Bjarki Már Jóhannsson sem landaði laxinum úr veiðistaðnum Stekk í morgun og tók hann Sunray á yfirborðinu.  Bjarki var einnig búinn að landa öðrum vænum laxi en það var 78 sm hrygna sem lét hafa mikið fyrir sér en 10 punda taumurinn var oft á mörkunum við að slitna í þeim átökum.  Þetta er áfangi fyrir Bjarka því hann hefur ekki náð laxi af þessari stærð áður og er loksins kominn í 20 punda klúbbinn.  Það er eiginlega furðulegt að hann hafi ekki náð þessu fyrr þar sem hann hefur verið mikið við veiðileiðsögn undanfarin ár og landað ansi mörgum löxum.  Veiðin í Norðurá er stígandi og laxinn sem er að veiðast vel haldinn eins og áður hefur verið greint frá.