Öflug fluga í köld vötn að vori

Núna eru vötnin ennþá köld og silungurinn getur legið ansi djúpt niðri og til þess að ná honum þarf að hafa réttu fluguna.

Það eru nokkrar flugur sem eru betri en aðrar svona í upphafi veiðitímabilsins og ein af þeim sem er mjög vinsæl og jafnramt gjöful er fluga sem er kölluð Mobuto.  Mobuto er efnið sem er notað í hana, svona svipað og Peacock heitir eftir páfuglsfjöðrum sem hún er hnýtt úr.  Það eru til nokkrar útgáfur af flugunni en þær tvær algengustu eru annars vegur sú að vefja einu sinni efni fram á búkinn en þá verður flugan grönn.  Síðan er það sú aðferð að vefja hana trisvar til þrisvar og þá á stuttan krók sem gerir hana feita eins og kuðung en það er nákvæmlega það sem verið er að líkja eftir.

Þegar þessi fluga er notuð, sérstaklega fyrstu vikurnar í veiði, er besta aðferðin að nota langan taum eina og hálfa stangarlengd og leyfa flugunni að sökkva vel.  Síðan er dregið löturhægt inn.  Þetta virkar mjög vel t.d. í Þingvallavatni og er kuðungableikjar sem dæmi mjög gráðug í þessa flugu þegar henni er rétt beitt.  Ef þú ert að veiða í djúpum vötnum getur líka verið gott að vefja einn umgang af blýi til að þyngja hana eða nota kúluhaus.  Hvort tveggja virkar mjög vel.