Travelers meistaramótið hefst í dag

Þrátt fyrir að nokkrir af bestu kylfingum heims taki sér frí helgina eftir Opna bandaríska eru margir sterkir kylfingar skráðir til leiks á Travelers meistaramótinu sem fram fer á TPC River Highlands vellinum og hefst í dag.

Mótið setur yfirleitt skemmtilegan svip á PGA-mótaröðina enda eru ávallt mjög margir áhorfendur sem fylgjast með og mikil stemning sem skapast í kring um það.

Bandaríkjamaðurinn Ken Duke sigraði á mótinu í fyrra en stjörnur á borð við Bubba Watson, Dustin Johnson, Sergio Garcia, Matt Kuchar, Jason Day og Keegan Bradley eru skráðar til leiks um helgina.

Rory McIlroy er þó ekki með að þessu sinni en hann leikur ávalt á Opna írska meistaramótinu á Evrópumótaröðinni sem fram fer á sama tíma.

Það má búast við fleiri fuglum nú um helgina heldur en á Opna bandaríska þar sem aðeins þrír kylfingar enduðu undir pari. Sýnt verður frá öllum fjórum hringjunum í beinni útsendingu á Golfstöðinni og hefst útsending klukkan 20:00 í kvöld.