Sala veiðileyfa mjög góð hjá Hreggnasa

Veiðifélagið Hreggnasi er eitt af þeim stærstu á markaðnum í dag og hafa þeir nokkrar af bestu ám landsins innan sinnan vébanda.

Meðal veiðisvæða hjá þeim eru Laxá í Kjós, Grímsá, Laxá í Dölum, Korpa og fleiri en staðan á leyfum hjá þeim er þannig í dag að svo til vonlaust er að komast í sumar árnar. Haraldur Eiríksson hjá Hreggnasa er ánægður með gang mála.  "Við erum mjög ánægðir með söluna hjá okkur og staðan er þannig núna að við eigum eina stöng eftir í Kjósinni, kannski nokkrar um miðjan september í einu holli í Grímsá og eitt holl í Laxá í Dölum, annað í þessum ám er bara farið".  Einhverjar stengir eru lausar í Korpu í ágúst en það er geysilega skemmtilegur tími í ánni en þá er mest veitt á efri svæðunum sem eru mjög vanmetin en það er mikil áskorun að veiða þar efra því öll aðkoma að ánni verður að vera tekin í hljóðum skrefum.  Einhverjar stangir voru lausar í Brynjudalsá í september en áin hefur oft verið í skugganum af Elliðaánum og Korpu þrátt fyrir að veiðin þar sé góð og aðeins er veitt á tvær stangir.  "Almennt finnst okkur meiri jákvæðni vera komin í veiðina aftur, við finnum þetta bæði hjá okkur og félagar okkar í veiðibúðunum segja það sama" bætir Haraldur við.