Hamarsvöllur verður tilbúinn

Mikil bleyta hefur gert kylfingum erfitt fyrir á Hamarsvelli í Borgarnesi en næsta mót Eimskipsmótaraðarinnar fer engu að síður fram þar síðar í mánuðinum.

GSÍ sendi frá sér tilkynningu þess efnis í gærkvöldi að næsta mót mótaraðarinnar færi fram á Hamarsvelli dagana 13.-15. júní eins og upphaflega stóð til.

Mótanefnd sambandsins íhugaði þann möguleika að skipta á mótum - að næsta mót færi fram á Garðavelli á Akranesi og að spilað yrði í Borgarnesi í ágúst. En ákveðið var að halda upphaflegri áætlun.

„Völlurinn er mjög blautur og hefði þurft 1-2 vikur til viðbótar. Nokkrar brautir eru eins og svampur,“ sagði Jóhannes Kristján Ármannsson, framkvæmdarstjóri Golfklúbbs Borgarness.

„En það er góð spá fram að móti og við eigum von á að það verði 20 stigi hjá okkur um helgina. Við verðum tilbúnir í mótið,“ bætti hann við.

Hann segir völlurinn hafi ekki komið neitt sérstaklega undan vetrinum, líkt og aðrir grasvellir á höfuðborgarsvæðinu. „Það er þó ekki mikið að kalskemmdum og ástand hans almennt ágætt.“

Tilkynning GSÍ:

„Næsta mót á Eimskipsmótaröðinni fer fram á Hamarsvelli í Borgarnesi 13.-15. júní og er skráningarfrestur í mótið til 9. júní n.k. Símamótið er mikilvægt mót fyrir okkar bestu kylfinga enda styttist í Íslandsmótið í holukeppni og fá efstu 32 kylfingar á Eimskipsmótaröðin að loknum 3 mótum keppnisrétt á Íslandsmótinu í holukeppni. Þá styttist í Evrópukeppnir landsliða og mun Úlfar Jónsson landsliðsþjálfari fylgjast grannt með gangi mála á mótinu og í framhaldinu mun hann tilkynna EM-liðin.

Mótanefnd GSÍ skoðaði þann möguleika að víxla mótum og færa Símamótið á Garðavöll og spila í Borgarnesi í ágúst, en horfið var frá þeirri ákvörðun og verður leikið á Hamarsvelli í Borgarnesi eins og fyrirhugað var í upphaflegri mótaskrá.“