Kjörsókn talsvert minni en í síðustu kosningum

Enn mælist kjörsókn víða um land talsvert minni en í undanförnum sveitastjórnarkosningum. Í Reykjavík höfðu 16.100 manns greitt atkvæði klukkan tvö. Á sama tíma fyrir fjórum árum höfðu 19.266 manns kosið.

Ef litið er til borgarstjórnarkosninga aftur til ársins 2002, líkt og gert er á heimasíðu Reykjavíkurborgar, sést greinilegt mynstur í fjölda kjósenda. Ef miðað er við tölur klukkan tíu, ellefu, tólf, eitt og tvö, hefur kjörsókn undantekningarlaust minnkað frá fyrri kosningum. Á þessum tíma árið 2006 höfðu 20.745 manns greitt atkvæði og árið 2002 voru það 22.960 manns.

Á síðu Kópavogsbæjar má sjá kjörsókn í þessum og síðustu bæjarstjórnarkosningum. Enn sem komið er mælist kjörsókn minni nú en árið 2010 á öllum tímum dagsins. Í síðustu kosningum mældist kjörsókn 20,6 prósent klukkan tvö en nú mælist hún 16,9 prósent.