Hjördís Svan Aðalheiðardóttir mun ekki áfrýja dómi danskra dómstóla, en hún var dæmd í 18 mánaða fangelsi fyrir brot á umgengnisrétti yfir dætrum sínum og ólöglegt brottnám þegar hún fór með þær í leyfisleysi frá Danmörku til Íslands. Rúv greinir frá þessu.
Í samtali við Rúv segir Thoas Berg, lögmaður hennar, að Hjördís hafi komist að þessari niðurstöðu vegna þess að það hefði tekið þrjá til fjóra mánuði að fá endanlegan dóm í málinu en hún vilji komast heim eins fljótt og mögulegt er og fá að afplána dóminn hérlendis. Hjördís hefur setið í gæsluvarðhaldi í Danmörku frá því í byrjun febrúar.
Stúlkurnar þrjár eru enn á Íslandi en Hjördís vill reyna að afstýra því að þær verði sendar út til föðurs síns.
Barnsfaðir Hjördísar, Kim Laursen, hefur farið fram á tvær milljónir í skaðabætur frá Hjördísi vegna málsins eins og greint var frá fyrr í mánuðinum.
Héraðsdómur Reykjavíkur fyrirskipaði afhendingu stúlknanna til föðurs síns á næstu vikum í apríl en þeim dómi hefur verið áfrýjað til Hæstaréttar sem mun taka málið fyrir á næstu vikum.
