Oddvitaáskorun - Nýtt afl í Húnaþingi vestra

Vísir stendur fyrir Oddvitaáskoruninni 2014 þar sem skorað er á oddvita allra flokka í kjördæmum um land allt að taka þátt.

Unnur Valborg Hilmarsdóttir leiðir N - listann Nýtt afl í Húnaþingi vestra í sveitarstjórnarkosningunum í vor.

Unnur kann hvergi betur við sig en úti í náttúrunni, í gönguferðum og útilegum með fjölskyldunni. Sem betur fer deilir eiginmaðurinn, Alfreð Alfreðsson, útileguáhuganum og festu þau hjónin kaup á gömlum tjaldvagni síðasta sumar.

Þau setja stefnuna á útilegur sem flestar helgar í sumar í vagninum góða með börnin og hundinn.  Unnur er uppalin á Hvammstanga til 10 ára aldurs en flutti aftur heim sl. haust eftir 30 ára búsetu sunnan heiða. Hún hefur þó alltaf sótt mikið norður og varið flestum fríum að hluta til eða öllu leyti á Hvammstanga. Unnur á þrjú börn, Myrkva Þór, 16 ára, Guðna þór, 3ja ára og Birtu Ögn, eins árs.

YFIRHEYRSLAN

Hver er fallegasti staðurinn á Íslandi?

Það er mér lífsins ómögulegt að nefna einn stað sem fallegasta stað á Íslandi. Ísland er fallegasta land í heimi og í hverjum landshluta eru staðir sem eiga engan sinn líkan í heiminum.  Mér þykir þó sérstaklega vænt um Kirkjuhvamm.

Hundar eða kettir?

Hundar - Heimilishundurinn Pamela er fjórða barnið á heimilinu. Hún er dönsk og skilur líklega enga íslensku ennþá þó hún hafi verið búsett á Íslandi í á fjórða ár. Í það minnsta hlýðir hún litlu sem engu.

Hver er stærsta stundin í lífinu?

Ég á þrjár „stærstu stundir“ í lífinu. Fæðingar barnanna minna þriggja. Svo kemst brúðkaup okkar hjóna klárlega líka á blað en við komum okkar nánustu á óvart og giftum okkur í blíðskaparveðri í Kirkjuhvammskirkju 29. mars sl.

Hver er uppáhaldsmaturinn þinn?

Ég er mikil matmanneskja og á erfitt með að velja eitthvað eitt uppáhalds, ég get nefnt hægeldaðan lambabóg, kalkún, sushi...og margt fleira.

Hvernig bíl ekur þú?

Toyotu Landcruiser 2005 árgerð.

Besta minningin?

Ég er svo lánsöm að eiga hafsjó af frábærum minningum. Það sem fyrst kemur upp í hugann er ferðalag fjölskyldunnar til Grikklands sumarið 2012 þegar við fórum í bakpokaferðalag í gríska eyjahafinu. Við fórum fjögur, ég , Alfreð maðurinn minn, Myrkvi Þór sonur minn sem þá var 15 ára og Guðni Þór sem þá var 15 mánaða. Algerlega ógleymanlegt ferðalag.

Hefur þú verið tekinn af lögreglunni?

Hmm...já. Var eitt sinn tekin fyrir of hraðan akstur í götunni sem ég bjó við í Reykjavík. Ég var á að því að mér minnir á 45 km hraða.

Hverju sérðu mest eftir?

Ég reyni að haga lífi mínu með þeim hætti að eftirsjáin sé sem minnst.  En ég get ekki neitað því að sjá eftir því að hafa hætt að læra á píanó sem barn, og jú líka að hafa hætt að æfa fimleika á sínum tíma.

Draumaferðalagið?

Það allra skemmtilegasta sem ég geri er að ferðast. Ég hef víða farið en á enn eftir að koma á fjölmarga áhugaverða staði. Indland er ofarlega á draumalistanum. Svo væri ég alveg til í að fara aftur með fjölskylduna í bakpokaferð um gríska eyjahafið. Rómantísk helgi með eiginmanninum í Róm væri líka vel þegin.

Hefur þú migið í saltan sjó?

Nei hef ekki orðið svo fræg.

Hvað er það skrýtnasta sem þú hefur gert?

Að fara með ungling, rúmlega ársgamalt barn og kall sem er að jafna sig á fótbroti í bakpokaferðalag til útlanda þar sem ekkert var skipulagt nema fyrsta siglingin sem við svo enduðum á að fara ekki í heldur fórum allt aðra leið. Reyndi verulega á skipulagsfríkið mig en heppnaðist stórkostlega vel.

Hefur þú viðurkennt mistök?

Já margoft. Ein af þeim lífsreglum sem ég held í heiðri er að viðurkenna mistökin fljótt og örugglega, biðjast afsökunar og læra af þeim.

Hverju ertu stoltastur af?

Börnunum mínum þremur. Þau eru skemmtilegasta fólk sem ég þekki og gera líf mitt betra á hverjum einasta degi. Á hæla þeirra kemur gangan á Mont Blanc 2008 - það var mikill og sætur sigur.

Fram að sveitarstjórnarkosningunum 31. maí munum við birta kynningu á oddvitum víðsvegar um landið. Allir oddvitar geta tekið þátt í Oddvitaáskorun Vísis. Nánari upplýsingar er hægt að nálgast á netfanginu samuel@365.is.