11 ára 20 punda sjóbirtingur

Arnór Laxfjörð Guðmundsson var við veiðar fyrir nokkru í Staðará og landaði þar sínum stærsta fiski úr ferskvatni sem var 20 punda sjóbirtingur.

Arnór er vanur stórum fiskum sem aflakló á sjó en þessi sjóbirtingur er stærsti fiskur sem hann landar á landi.  Þegar myndir af fiskinum fóru á Facebook voru margir sem héldu því fram að þarna væri kominn fram einn af löxunum sem sluppu úr kvíum fyrir vestan nokkrum dögum fyrir veiðitúrinn og þá fullyrtu margir að það sæist vel á fiskinum að þetta væri eldislax.  Til að taka af allann vafa tók Arnór hreisturssýni til að fá úr þessu skorið og niðurstaðan af þeim sýnum er komin í hús.  Staðfest er að þarna er sjóbirtingur á ferð.  Hann er 11 vetra gamall og hefur gengið átta sinnum til sjávar á sinni ævi.  Fiskurinn er jafnframt á listanum yfir tuttugu stærstu veiddu sjóbirtinga á landinu, í það minnsta þá sem eru skráðir á réttann hátt.  Við óskum Arnóri til hamingju með þennan flotta fisk og hlökkum til að fá fregnir af veiðiskapnum hjá honum í sumar.