Ágætis veiði í Grímsá

Ágætis veiði hefur verið fyrstu dagana í vorveiðinni í Grímsá en ekki hafa samt heyrst neinar tölur en þeir sem eru þar við veiðar hafa ekki viljað láta mikið uppi um veiðina.

Það er svo sem alveg sjálfsagt að segja stundum ekki of mikið en það er samt svo gaman að heyra frá veiðimönnum þegar vel gengur og vonandi fáum við einhverjar fréttir af þeim sem eiga daga þarna framundan.  Hreggnasi hefur veg og vanda að vorveiðinni í Grímsá og einnig í Laxá í Kjós sem er önnur stór áin hjá félaginu.  Þeir sem hafa veitt Laxá í Kjós í lok júní byrjun júlí þekkja vel hvernig áin allt í einu fyllist af sjóbirting.  Veiðistaðir frá Laxfossi upp á Hurðarbakshyl fyllast oft af vænum birting en eins gengur eitthvað af honum lengra upp í ánna veiðimönnum til mikillar ánægju.  Hreggnasi hefur boðið uppá vorveiði í Kjósinni og það komast færri að en vilja.  Áin er frábær vorveiðiá og skemmtileg viðbót við veiðimöguleika þeirra sem finnst fátt eins gaman og að eltast við sjóbirting.  Vorveiði í Laxá er þess til að gera frekar ný en það er greinilegt að leigutakar þeirra veiðisvæða sem geyma mikið af sjóbirting eru að skoða hvaða möguleikar eru í boði fyrir vorveiði, það sést t.d. á tilraunaveiðum í Víðidalsá sem gefið hafa góða raun og verður vonandi framhald þar á.