Fátt virðist geta stoppað Adam Scott á Bay Hill

Það virðist vera ógerlegt að stoppa Adam Scott á Arnold Palmer Invitational mótinu sem fram fer á Bay Hill en Ástralinn er fjórtán höggum undir pari eftir tvo hringi og leiðir mótið með heilum sjö höggum. Scott byrjaði mótið með stíl og lék fyrsta hringinn á tíu höggum undir pari. Hann fylgdi því eftir með góðum hring í gær og lék á fjórum höggum undir pari og því virðist fátt geta stoppað Masters meistarann frá því í fyrra en með frammistöðum eins og þessum verður Scott að teljast líklegur til þess að verja titilinn á Augusta sem fram fer 10-13 apríl.

Í öðru sæti eru Bandaríkjamennirnir J.B Holmes, Chesson Hadley og Ítalinn Francesco Molinari sem virðist vera í toppbaráttunni í öllum mótum sem hann spilar í þessa dagana. Þeir eru á sjö höggum undir pari en nokkrir kylfingar eru á sex höggum undir, meðal annars Brandt Snedeker og Keegan Bradley. Það eru því margir góðir kylfingar sem gætu sett pressu á Scott ef hann misstígur sig um helgina.

Bein útsending frá þriðja hring hefst á Golfstöðinni klukkan 16:30 í dag.