Það er ástæða fyrir öllu

Formúlukappinn Lewis Hamilton sagði hluti á blaðamannafundi í Ástralíu í gær sem fóru misjafnlega vel í fólk.

Eins og við var að búast var hann spurður út í Michael Schumacher sem berst fyrir lífi sínu í Frakklandi. Eftir að hafa talað fallega um Schumacher sagði Hamilton að það væri ástæða fyrir öllu því sem gerðist.

"Michael er goðsögn í þessari íþrótt og hefur afrekað ótrúlega mikið. Hann er hvetjandi einstaklingur sem má læra mikið af. Ég trúi því að það sé ástæða fyrir öllu sem gerist. Ég held að þessi reynsla muni sýna á endanum hversu ótrúlegur maður hann er," sagði Hamilton en hann er að keyra vel á æfingum fyrir Ástralíu-kappaksturinn um helgina.

Hamilton er mjög trúaður maður en mörgum fannst ósmekklegt af honum að segja þessa hluti um Schumacher og slysið hræðilega sem hann lenti í.