Arnold Palmer Invitational hefst á morgun

Arnold Palmer Invitational hefst á morgun en mótið fer fram eins og vanalega á Bay Hill vellinum í Orlando. Nánast öll stærstu nöfn PGA-mótaraðarinnar verða með en ljóst er að Tiger Woods á eftir að verða saknað en hann gaf út yfirlýsingu í gær um að hann yrði ekki með vegna bakmeiðsla sem hafa hrjáð hann undanfarið. Woods hefur unnið mótið síðustu tvö ár og alls átta sinnum á þeim 18 árum sem hann hefur verið atvinnumaður.

Á fyrsta og öðrum hring eru nokkur áhugaverð holl sem gaman verður að fylgjast með, til að mynda leikur fyrrum Masters sigurvegarinn Bubba Watson með ungstirninu Rickie Fowler ásamt FedEx meistaranum frá 2012, Brandt Snedeker. Þá leika Justin Rose, Adam Scott og hinn kokhrausti Patrick Reed saman í holli á meðan að Bandaríkjamaðurinn og fyrrum PGA-meistarinn Keegan Bradley er paraður með evrópska dúóinu Ian Poulter og Henrik Stenson.

Veðurspáin fyrir mótið er mjög góð og ættu því að vera kjör aðstæður fyrir bestu kylfinga heims til þess að skora vel á Bay Hill vellinum, sem oft getur reynst mjög erfiður þegar að aðstæður eru ekki sem bestar. Mótið hefst eins og áður segir á morgun en það verður í beinni útsendingu frá klukkan 19:00 á Golfstöðinni.