Mercedes á að vinna tvöfalt

Toto Wolff, framkvæmdastjóri Formúlu 1 liðs Mercedes segir að liðið verði að halda forskotinu sem það hefur á keppinautana. Liðið sýndi að það hefur forskot á önnur lið í Ástralíu. Í tímatökunni varð Lewis Hamilton fljótastur á Mercedes bíl sínum. Liðsfélagi hans, Nico Rosberg sigraði svo keppnina með þó nokkrum yfirburðum.

Toto Wolff segir að það yrði algjört klúður að vinna ekki bæði heimsmeistarakeppni bílasmiða og ökumanna. Hann ítrekar þó að liðið hafi ekki mikið forskot og bendir á framfarir Red Bull liðsins. Meistararnir náðu lítið að æfa í vetur en eru svo orðnir samkeppnishæfir strax í fyrstu keppni.

„Ef þú horfir á hversu mikið Red Bull hefur bætt sig, eftir mjög lítinn akstur á æfingum, það vekur alla til umhugsunar. Sjáðu hvar þeir voru fyrir tvemur til þremur vikum síðan í Bahrain, svo við þurfum að vera á varðbergi, og við höfum ekki séð Sebastian [Vettel] í áreiðanlegum, hraðskreiðum bíl.“ Sagði Toto Wolff.

„Maður myndi ætla að hann, með alla hans reynslu, verði mjög hraðskreiður svo við verðum að halda áfram af krafti.“ „Ég held að þú getir aldrei hallað þér aftur og sagst hafa þægilegt forskot.“ Sagði Wolff að lokum.