Vettel komst ekki nema hálfan hring – Massa fljótastur

Fjórfaldi heimsmeistarinn Sebastian Vettel ók aðeins hálfan hring á æfingu dagsins í dag en nú styttist óðum í að keppnistímabilið í formúlu eitt hefjist.

Red Bull bíll hans Sebastian Vettel fór ekki langt því hann nam staðar á brautinni og í annarri tilraun tókst honum ekki að komast af þjónustusvæðinu. Þetta eru mikil vonbrigði fyrir Red Bull sem átti sinn besta dag til þessa í gær.

Sömu sögu er að segja af Sauber liðinu. Því tókst ekki að ljúka hring í dag. Ástæðan fyrir skyndilegum erfiðleikum er líklega sú að liðin reyna nú á þolmörk vélanna. Einnig eru liðin að prófa ýmsar viðbætur í átt að auknum hraða. Sumar þeirra virðast hreinlega geta kyrrsett bíla sem virkuðu vel áður.

Felipe Massa á Williams átti besta tíma dagsins 1:33.258, hann ók samtals 94 hringi. Nico Rosberg á Mercedes setti annan besta tíma dagsins, 1:33.484 en hann ók 100 hringi.

Rosberg var sá eini sem komst nálægt tíma Massa. Þriðji varð Kimi Raikkonen á Ferrari en hans besti tími var 1:35.487. Raikkonen ók 79 hringi.

Lotus liðið virðist enn eiga í basli með áreiðanleika bílsins, hann fór aðeins 33 hringi í dag. Roman Grosjean var undir stýri og setti níunda besta tímann. Liðið vann Ástralska kappaksturinn í fyrra og varð í 4. sæti í keppni bílasmiða á tímabilinu. Mikið þarf að lagast ef Lotus ætlar að endurtaka þann leik í Ástralíu 16. mars.

Caterham bíllinn fór 106 hringi undir stjórn Marcus Ericsson. Einungis Nico Hulkenberg á Force India fór lengra, hann ók 108 hringi. Hulkenberg átti sjötta besta tíma dagsins.

Morgundagurinn er síðasti æfingadagurinn fyrir komandi tímabil. Mörg lið munu þá reyna að herma eftir aðstæðum í tímatöku. Þá verður spennandi að sjá hver endar efstur á blaði.