Vilja handtaka þrjá vegna hvarfs Madeleine

Breska lögreglan hefur sent starfsbræðrum sínum í Portúgal formlega beiðni um að þrír menn verði handteknir í tengslum við hvarf Madeleine McCann. Madeleine, eða Maddy, hvarf úr hótelherbergi foreldra sinna á Algarve í Portúgal árið 2007, þá þriggja ára að aldri.

Frá þessu segir á vef Daily Mirror.

Vitað er að mennirnir þrír sem um ræðir frömdu nokkur innbrot í nágrenni hótelsins nóttina sem Maddy hvarf.

Talsmaður McCann-hjónanna sagði við Mirror að beiðni bresku lögreglunnar marki ákveðin vatnaskil í málinu.

„Lögreglan vill fá tækifæri til að handtaka þessa grunuðu menn. Það sannar ekki að þeir séu með Madeleine, en þá er altjent hægt að ákvarða hvort þeir tengist rannsókninni eða ekki og það er mikilvægt. Kate og Gerry (McCann) vilja ekki gera sér of háar væntingar en átta sig á því að þetta gæti verið mikilvæg vísbending.“

Rannsókn málsins hefur verið þyrnum stráð þar sem margir hafa gagnrýnt vinnubrögð portúgölsku lögreglunnar. Breska lögreglan hóf eigin rannsókn árið 2011, en samvinnan milli lögregluliða landanna hefur ekki verið eins og best verður á kosið.

35 lögreglumenn vinna nú að málinu, en fátt hefur dregið til tíðinda utan þess að í október var birt tölvumynd af manni sem er grunaður um að tengjast hvarfinu. Það varð til þess að 3.500 ábendingar bárust. Þar af voru tvær sem beindust að sama einstaklingi.

McCann-hjónin voru með réttarstöðu grunaðs fólks eftir hvarfið og fram á árið 2008, en voru síðan hreinsuð af öllum ásökunum, sem og breskur fasteignasali sem bjó í Portúgal á þeim tíma.