Opið fyrir umsóknir hjá SVFR

Nú er opið fyrir umsóknir veiðileyfa hjá SVFR og sem fyrr er úrvalið til veiðimanna á veiðisvæðum gott en sum svæðin eru greinilega vinsælli en önnur.

Þrátt fyrir að SVFR hafi misst tvær af sínum stærri ám, Norðurá og Laxá í Dölum, býður félagið mikið úrval veiðisvæða sem henta öllum félagsmönnum.  Flaggskip félagsins að þessu sinni er Langá á Mýrum en hún hefur verið vel sótt og veiðin í henni verið frábær síðustu ár ef undanskilið er árið 2012.  Laxá í Mývatnssveit hefur sterkan hóp aðdáenda sem fara í hana á hverju ári og margir hafa veitt sömu dagana í hátt í áratug.  Eitt af nýju heitu svæðunum hjá félaganu eru Steinsmýrarvötn en þar er mikil veiði og verð veiðileyfa stillt í hóf svo þar ættu allir að geta komist í góða veiði fyrir lítinn pening.  Það má reikna með mikilli aðsókn í Hítará sem og í Elliðaárnar en áfram verður farið þá leið að sótt er sérstaklega um þær eins og í fyrra svo A leyfin þarf ekki að nýta í þá umsókn heldur nýtist hún í aðrar umsóknir.

Þegar umsóknarferli og úthlutunarferli lýkur fara veiðileyfi félagsins í almenna sölu.  Frekari upplýsingar um umsóknir er að finna á heimasíðu SVFR, www.svfr.is