Viðskipti erlent

Herkúlesi ætlað að finna færeyska olíu

Kristján Már Unnarsson skrifar
Tveir olíubrunnar, sem norska olíufélagið Statoil ætlar að bora í lögsögu Færeyja á þessu ári fyrir þrjátíu til fjörutíu milljarða króna, verða dýrasta verkefni í atvinnusögu eyjanna til þessa. Færeyskir ráðamenn eru fullir bjartsýni. 

 Borpallurinn West Hercules hefur verið fenginn til að bora báðar holurnar en þetta verður viðamesta olíuleit til þessa í Færeyjum og jafnframt dýrasta einstaka atvinnuvegafjárfesting í sögu eyjanna. Statoil er í samstarfi með tveimur öðrum félögum í hvoru verkefni, með bandaríska ExxonMobil og færeyska Atlantic Petroleum í annarri holunni en með austurríska félaginu OMV og danska félaginu DONG í hinni holunni.

Jan Müller, framkvæmdastjóri samtaka olíuleitarfélaga í Færeyjum.Mynd/Baldur Hrafnkell Jónsson, Stöð 2.
Jan Müller, sem er framkvæmdastjóri samtaka olíuleitarfyrirtækja í Færeyjum, segir að kostnaður sé talinn verða á bilinu einn og hálfur til tveir milljarðar danskra króna, eða allt að fjörutíu milljarðar íslenskra króna. Hann áætlar að tvö til þrjúhundruð milljónir danskra króna, eða fjórir til sex milljarðar íslenskra, renni beint inn í færeyskt samfélag. Það gerist í gegnum þjónustusamninga við undirverktaka en einnig fær færeyski landskassinn skatttekjur, meðal annars af 300 manna áhöfn borpallsins.

Til þessa hafa átta holur verið boraðar í olíuleitinni við Færeyjar á síðustu þrettán árum og hefur Rúnavík verið þjónustuhöfn í öll skiptin. Svo verður einnig að þessu sinni. Stefnt er að því að boranir hefjist í aprílmánuði og er áætlað að verkið taki um hálft ár.

Færeyskir ráðamenn lýstu í viðtali við Stöð 2 í vor mikilli bjartsýni. Atvinnumálaráðherrann Jóhan Dahl kvaðst sannfærður um að Færeyingar yrðu olíuþjóð og rifjaði upp að í Noregi hafi þurft að bora yfir þrjátíu holur áður en olían fannst. 

„Það hefur þegar fundist olía. Það var bara ekki nógu mikið til þess að vinna úr því. Svo það er bara spurning um tíma hvenær olían kemur," sagði Högni Hoydal, formaður Þjóðveldisflokskins.  

Og Jan Müller bendir á að þeir miklu fjármunir sem olíufélögin eru tilbúin að leggja í verkefnið segi sitt um þeirra trú á að arðbærar olíulindir finnist við Færeyjar.


Tengdar fréttir

Færeyingar fá nýja flugstöð

Færeyingar sækja nú hratt fram í flugmálum. Þeir eru að fá þrjár nýjar þotur, reisa nýja flugstöð, eru nýbúnir að stækka flugvöllinn og sjá fram á vaxandi þyrluflug til olíuborpalla. Fyrsta Airbus-þota Atlantic Airways er að koma inn til lendingar á einu flugbraut Færeyja en lenging hennar úr 1.250 metrum upp í 1.800 metra í fyrra var forsenda þess að færeyska flugfélagið réðst í kaup á þremur slíkum þotum.

Færeyskar útgerðir færa sig í olíuiðnað

Færeyskir útgerðarmenn, sem áður réru til fiskjar, hafa í auknum mæli snúið sér að olíuútgerð og gera nú út nærri tuttugu sérhæfð skip fyrir olíuiðnað. Olíuútrás Færeyinga skilar nú átta til ellefu prósentum af þjóðartekjum eyjanna. Jan Müller ritstýrir fréttavefmiðli færeyska olíugeirans og hann segir okkur að þótt engin vinnanleg olía hafi ennþá fundist í lögsögu Færeyja starfi samt milli þúsund og fimmtán hundruð Færeyingar við olíuiðnaðinn, margir þeirra erlendis. "Til dæmis eru 250 færeyskir rafvirkjar leigðir út til að vinna í norska olíuiðnaðinum.

Vissara að Færeyingar verði sjálfstæðir áður en olían finnst

Atvinnumálaráðherra Færeyja, Jóhan Dahl, kveðst handviss um að Færeyingar verði olíuþjóð. Högni Hoydal, formaður Þjóðveldisflokksins, segir mikilvægt að Færeyingar fái sjálfstæði áður en olían finnst, - olíufundur geti leitt til þess að Danir verði tregari að slíta sambandinu. Kannanir sýna að Færeyingar skiptast nokkurn veginn til helminga í afstöðunni til þess hvort slíta eigi sambandinu við Dani. En gæti stór olíufundur breytt miklu í sjálfstæðismálunum? Stuðningur Dana nemur um ellefu prósentum af fjárlögum Færeyja og yrði væntalega óþarfur ef olían finnst. Högna Hoydal finnst tryggast að fá sjálfstæðið áður: "Við sjáum hvað er að gerast í Grænlandi. Það er sama mál.



Mest lesið


Fleiri fréttir

Sjá meira


×

Mest lesið