Gefur góð fyrirheit

Afrekssjóði ÍSÍ barst í gær vænn styrkur frá ríkisstjórn Íslands er hún tilkynnti í gær að hún myndi styrkja sjóðinn árlega um tvær milljónir fram yfir Ólympíuleikana í Ríó 2016, samtals um átta milljónir. Upphæðin er eyrnamerkt Anítu Hinriksdóttur, nýkrýndum heims- og Evrópumeistara ungmenna í 800 m hlaupi.

Fram kemur í tilkynningu forsætisráðuneytis að mikilvægt sé að auka fjárhagslegan stuðning ríkisins við Afrekssjóðinn. Hann úthlutaði 71 milljón á síðasta ári en þá var framlag ríkisins 55 milljónir. Við síðustu úthlutun kom í ljós að úthlutunin náði yfir aðeins 15 prósent kostnaðaráætlunar þeirra sérsambanda sem sóttu um styrki úr Afrekssjóðnum.

„Afreksíþróttastarf er kostnaðarsamt og er mikilvægt að styðja við bakið á Anítu svo hún geti helgað sig æfingum og keppni til undirbúnings þátttöku á alþjóðlegum stórmótum,“ segir í tilkynningunni.

Örn Andrésson, formaður Afrekssjóðs, er bjartsýnni nú en oft áður á aukna aðkomu ríkisvalds að afreksíþróttastarfi á Íslandi.

„Þessi styrkveiting var viðurkenning á því að það þarf meiri peninga í afreksmálin á Íslandi. Aníta er mikil fyrirmynd fyrir ungt íþróttafólk, enda ung afrekskona sem hefur náð langt þrátt fyrir ungan aldur. Það kom fram í máli forsætisráðherra að við þyrftum fyrirmyndir og að þjóðin þjappaði sér ávallt saman þegar íþróttafólkinu okkar gengi vel,“ segir Örn við Fréttablaðið.

Fyrrverandi ríkisstjórn var reiðubúin að ganga til samninga við ÍSÍ um aðkomu að Afrekssjóðnum næstu fjögur árin áður en gengið var til kosninga í vor. Forráðamenn ÍSÍ ákváðu hins vegar að skrifa ekki undir hann og halda frekar í viðræður við nýja ríkistjórn eftir kosningar.

„Okkur fannst tilboð þáverandi ríkisstjórnar ekki nógu gott. Því ákváðum við að bíða. Það var áætlað að hefja viðræður í júní en þær frestuðust vegna fráfalls Ólafs Rafnssonar [formanns ÍSÍ]. Viðræður geta nú vonandi hafist í næsta mánuði.“

Örn bendir á að úthlutanir úr Afrekssjóði nái aðeins yfir útlagðan kostnað íþróttamanna fyrir keppni og ekki nema litlu leyti til æfinga. Hann bendir einnig á að aðkoma skólakerfisins mætti vera betri svo ungt íþróttafólk gæti betur samræmt nám við æfingar og keppni.

„Nú er til dæmis verið að herða reglur LÍN en við viljum að íþróttafólki verði gefinn kostur á að stunda sitt nám á lengri tíma svo að það geti sinnt sinni íþrótt. Brottfall afreksíþróttafólks verður sífellt meira og við viljum sporna við því,“ segir Örn.

Hann er vongóður um að ríkisstjórnin sé reiðubúin að auka aðkomu sína að afreksíþróttum.

„Það virðist vera breiðari skilningur fyrir þessum málum innan ríkisstjórnarinnar en oft áður. En svo verður bara að koma í ljós hvað verður þegar viðræður hefjast formlega.“