Skemmta sér þegar færi gefst

„Það er mikil stemning í liðinu, gaman á æfingum og í leikjum,“ segir Ruth Þórðar Þórðardóttir, miðjumaður Fylkis í 1. deild kvenna. Eftir samfellda veru meðal þeirra bestu frá árinu 2006 féllu Árbæingar síðastliðið haust. Leikmenn liðsins veltu framtíð sinni fyrir sér en úr varð að flestir héldu kyrru fyrir.

„Okkur leist vel á Rögnu Lóu [Stefánsdóttur]. Hún var með skýr markmið sem við vorum tilbúnar að vinna að. Við erum margar uppaldar og með mikið Fylkishjarta,“ segir Ruth. Rúna Sif Stefánsdóttir söðlaði þó um og hefur blómstrað í toppliði Stjörnunnar í efstu deild en aðrir kusu appelsínugula búninginn.

Kvenkyns þjálfarar reynst vel

Ragna Lóa tók við liði Fylkis í vetur og hefur gengi liðsins verið með ágætum. Liðið hefur unnið sjö leiki og gert tvö jafntefli í 1. deildinni auk þess sem liðið er komið í undanúrslit Borgunarbikarsins.

„Við höfum góða reynslu af kvenkyns þjálfurum,“ segir Ruth og rifjar upp þegar Kristbjörg Ingadóttir tók við nýstofnuðum meistaraflokki félagsins árið 2005. „Ári síðar vorum við komnar í efstu deild,“ segir Ruth en síðan hafa karlar verið í þjálfarastólnum. Spurð um muninn að leika undir stjórn karls eða konu verður Ruth hugsi.

„Hvort er gott á sinn hátt. Jón Páll [Pálmason, þjálfari Fylkis í fyrra] sagði að það væri miklu erfiðara að þjálfa stelpur. Þar væru alls konar vandamál sem finnast ekki hjá strákum,“ segir Ruth.

Ætla alla leið í bikarnum

„Við ætlum að komast í þessa úrslitakeppni, vinna hana og ætlum líka alla leið í bikarnum,“ segir Ruth borubrött. Liðið sló Pepsi-deildarlið HK/Víkings úr keppni í átta liða úrslitum og fram undan er slagur við Breiðablik 26.júlí.

„Við teljum okkur vera alveg nógu góðar til að gera hvort tveggja og höfum sýnt það í sumar.“ Sökum góðs árangurs í bikarnum er dagskrá Fylkiskvenna nokkuð þétt næstu vikur. Rut telur það geta komið liðinu til góðs fyrir bikarleikinn. Þannig sé tímabil Blika brotið upp af Evrópumóti landsliða á meðan Fylkiskonur æfi og spili baki brotnu.

Engar djammdrottningar

Nokkuð hefur verið slúðrað á samfélagsmiðlum um tíðar komur leikmanna Fylkis á skemmtistaði Reykjavíkur. Hefur Ruth meðal annars svarað fyrir sig og sína á Twitter en hvað ætli henni finnist um umtalið?

„Mér fannst þetta frekar ýkt. Fólk var aðeins of mikið að velta sér upp úr þessu. Við erum allar vinkonur og ef við förum að skemmta okkur þá förum við allar saman. Það er kannski meira áberandi en þegar ein Stjörnustelpa fer að skemmta sér eða eitthvað svoleiðis,“ segir Ruth. Þær appelsínugulu kunni þó að gera sér glaðan dag.

„Okkur finnst gaman að skemmta okkur og fannst þetta fyndið,“ segir Ruth. Hún telur þó ekki mega rekja slakt gegni liðsins í fyrra til næturbrölts leikmanna liðsins.

„Við vorum með skýrar reglur og fórum alfarið eftir þeim. Við nýttum hins vegar tækifærið þegar við máttum skemmta okkur og gerðum það almennilega.“