Vill enga auglýsingasamninga strax

Hlaupakonan stórefnilega Aníta Hinriksdóttir hefur vakið mikla athygli síðasta árið enda er þessi 17 ára stelpa búin að bæta Íslandsmetið í 800 metra hlaupi um fjórar sekúndur á aðeins tólf mánuðum. Stúlkan nýtur mikillar athygli en það er þó ekki von á henni í auglýsingum á næstunni.

„Það hafa mörg fyrirtæki haft samband við hana og boðið henni að vera í auglýsingum en hún vill það bara ekki. Hún vill bíða með allt svoleiðis en kannski kemur að því. Hún er sautján ára og henni finnst hún fá næga athygli nú þegar,“ segir Gunnar Páll Jóakimsson, þjálfari Anítu.

„Við vorum komin langt í viðræðum við fyrirtæki í fyrra en þá fór hún að hugsa málið og vildi ekki taka þátt. Hún á kannski eftir að líta öðruvísi á þetta eftir eitt eða tvö ár,“ sagði Gunnar.