Erlingur semur líklega við Westvien

Þjálfarinn Erlingur Richardsson er staddur í Austurríki þessa dagana og hefur verið þar alla vikuna að reyna að ganga frá samningi við austurríska úrvalsdeildarfélagið SG Insignis Handball Westwien. Mánuður er síðan félagið sóttist eftir kröftum hans.

Samkvæmt heimildum Fréttablaðsins mun Erlingur skrifa undir tveggja ára samning við félagið en hann vildi ekki staðfesta það við blaðið í gær.

„Málin eru enn í vinnslu og verið að fara yfir þetta. Það ætti þó að skýrast um helgina hvað verður,“ sagði Erlingur en hann kom ÍBV upp í efstu deild í vetur. Hann er einnig í þjálfarateymi íslenska landsliðsins.

„Mér líst ágætlega á aðstæður hérna. Þetta er talsvert annað en heima. Viðræður hafa gengið þokkalega við félagið. Maður veit samt aldrei hvernig þetta fer.“