Leiðrétting tekur gildi um mitt ár 2014

Ráðist verður í lækkun höfuðstóls verðtryggðra húsnæðislána og veitt verður skattaívilnun vegna séreignarlífeyrissparnaðar til leiðréttingar á á húsnæðisskuldum heimila í landinu. Þetta kom fram á fundi Sigmundar Davíðs Gunnlaugssonar forsætisráðherra og Bjarna Benediktssonar fjármálaráðherra þegar þeir kynntu leiðréttingar vegna verðtryggðra húsnæðislána í Hörpu rétt í þessu.

Verðtryggð húsnæðislán verða færð niður um fjárhæð sem samsvarar verðbótum umfram 4,8% sem féllu til á tímabilinu desember 2007 til ágúst 2010. Þetta samsvarar um 13% leiðréttingu á vísitölu neysluverðs til verðtryggingar. Hámarksfjárhæð niðurfærslu á heimili verður 4 milljónum króna. Fyrri úrræði til lækkunar koma til lækkunar.

Þau heimili sem skulda húsnæðislán geta nýtt greiðslur sem ella rynnu inn í séreignarsjóði til þess að greiða inn á húsnæðislán sín. Ríkissjóður gefur eftir tekjuskatt af allt að 4% iðgjaldi launþega og allt að 2% mótframlagi vinnuveitenda í séreignarlífeyrissparnað gegn því að þeim fjármunum sé varið til inngreiðslna á höfuðstól húsnæðislána. Skattleysi takmarkast við 500 þúsund kr. á ári. Úrræðið gildir í þrjú ár

Heildarumfang niðurfellingarinnar er metið á um 150 milljarða króna sem dreifist yfir fjögurra ára tímabil. Leiðréttingar verðtryggðra húsnæðislána nema um 80 milljarða króna og höfuðstólslækkun með nýtingu séreignarlífeyrissparnaðar um 70 milljörðum króna.

Þetta mat er þó háð nokkurri óvissu. Ríkissjóður mun hafa milligöngu um fjármögnun og framkvæmd hennar. Ekki er þörf á stofnun leiðréttingarsjóðs þar sem aðgerðin verður að fullu fjármögnuð. Gert er ráð fyrir því að hrein áhrif á ríkissjóð verði óveruleg fyrir hvert ár á tímabilinu 2014-2017.