Birgir Leifur fékk tvo skramba og hrundi niður listann

Birgir Leifur Hafþórsson, atvinnukylfingur úr GKG og Íslandsmeistari í höggleik árið 2013, náði ekki að fylgja eftir frábærum fyrsta hring á Open Blue Green Côtes d'Armor Bretagne golfmótinu í Frakklandi en hann þurfi átta fleiri högg til að klára annan hringinn í dag. Tveir skrambar fóru illa með Íslandsmeistarann á seinni níu og Birgir Leifur hrundi niður listann eftir að hafa verið í toppbaráttunni eftir fyrstu 18 holurnar.

Birgir Leifur lék annan hringinn á 73 höggum eða þremur höggum yfir pari. Hann hefur þegar dottið niður um 19 sæti en það gæti breyst því margir kylfingar eiga eftir að klára annan hringinn.

Birgir Leifur var í öðru sæti eftir fyrstu átján holurnar þar sem hann náði meðal annars sex fuglum. Hann var reyndar með fjóra fugla á öðrum hringnum en 10. og 14. holan fóru illa með hann. Birgir tapaði tveimur höggum á báðum þessum holum.

Ítalinn Andrea Pavan er að stinga af enn hann lék á fimm undir pari í dag og sex undir pari í gær. Hann er því á ellefu höggum undir pari eftir fyrstu 36 holurnar.